Best in the World!
Dadlı yemək reseptləri bloqu

Monthly archive for May 2011

Sobada Tərəvəzli Bişmə

Bu yeməkdə yaz və yayın bütün rənglərini tapmaq olar – qırmızı, sarı, yaşıl, narıncı, qəhvəyi.

Bu mövsümlərdə asanlıqla tapılan tərəvəz və göydən hazırlanan bu bişməni həm qəlyanaltı kimi, həm yüngül yemək, həm də ət yeməklərinin yanında qarnitur kimi süfrəyə verə bilərsiniz.


Sobada Tərəvəzli Bişmə
Jenni Fleetwoodun One-Pot, Slow-Pot and Clay-Pot Cooking kitabından adaptə edilmişdir

Əgər kabaçok yoxdursa, onu badımcanla əvəz etmək olar. Sarı bibər yerinə narıncı bibərdən istifadə etmək olar. Kəklikotu əvəzinə reyhan vurmaq olar.

6 pay üçün

Ərzaqlar:

1 ədəd balaca badımcan – saplağını kəsin, badımcanı uzunlamasına yarı bölün, yarıları da halqavari qalın-qalın kəsin
1 ədəd yumurta
1 stəkan un (150 qram)
1 stəkan + bir stəkanın dörtdə birisi qədər süd
2 xörək qaşığı təzə kəklikotu və ya 2 çay qaşığı quru kəkliokotu
1 ədəd qırmızı soğan
2 ədəd kabaçok
1 ədəd qırmızı Bolqar bibəri
1  ədəd sarı Bolqar bibəri
4 xörək qaşığı zeytun yağı
2  xörək qaşığı sürtgəcdən keçirilmiş Parmezan pendiri
Duz, istiot
Üstünə səpmək üçün hər hansı bir göyərti (mən cəfəri səpirəm) – xırda doğrayın

Hazırlama Qaydası:

Bir kasada yumurta, un, süd, kəkliotu, zövqə görə duz və istiotu duru hamar kütlə alınanadək qarışdırın. Kasanı soyuq yerə qoyun.

Badımcanları süzgəcin içinə yığıb, yaxşıca duzlayın. Qoyun acısı çıxsın – təxminən 10 dəqiqə ərzində. Sonra sudan keçirib, qurulayın.

Sobanı 205Cdək qızdırın.

Söğanı nazik dilimlərə kəsin. Kabaçoku halqavari kəsin.  Bibərlərin dənəsini çıxardıb, hər bibəri uzunlamasına 4-6 yerə bölün. Bütün tərəvəzləri ölçüsü 33 sm x 25 sm olan formaya yığın. Üstünə zeytun yağını əlavə edib, əlinizlə qarışdırın. Tərəvəzləri bir lay şəklində yayın. Sobada üstləri bir az qızaranadək bişirin, təxminən 20 dəqiqə.

Sonra isə sobadan çıxardıb, südlü kütləni (qaşıqla qarışdırın) tərəvəzlərin hər tərəfinə tökün. Sobada 30-35 dəqiqə və yaxud südlü qarışıq bir az şişib qızaranadək bişirin. Bişməni sobadan çıxardın. Üstünə Parmezan pendiri və göyərti səpin. Bişmə bir qədər soyuduqdan sonra süfrəyə verilməyə hazırdır. Bişməni soyuq halda da yemək olar.