Əslində bu qurabiyələr Ricotta (rikotta oxunur) adlanan İtalyan pendirindən hazırlanır. Pendir deyəndə ki, bizim bildiyimiz bərk pendirlərdən deyil. Ricotta pendiri Azərbaycanda istifadə edilən kəsmiklə hardasa eynidir. Bəlkə kəsmikdən bir az suludur. Azərbaycandakı supermarketlərdə bu pendirdən ola bilər, əmin deyiləm. Əgər varsa, bu qurabiyələri ricotta pendiriylə hazırlayın. Yox əgər yoxdursa, problem deyil, elə kəsmik də çox yaxşı nəticə verər. Bu qurabiyələr yumuşaq və zərif olurlar. Həm də ətirli, çünki içində limon qabığı və hil də var. Məncə bəyənəcəksiniz. Nuş Olsun!

RİCOTTA PENDİRLİ ( VƏ YA KƏSMİKLİ) QURABİYƏ

22 qurabiyə üçün

Ərzaqlar

2   1/2 stəkan əla növ un
1 çay qaşığı qabartma tozu (yarım qaşıq çay sodası ilə əvəz edə bilərsiniz)
1 çay qaşığı duz
1/5  çay qaşığı hil (toz halında) – (hiliniz yoxdursa, əlavə etməsəniz də olar)
115 g duzsuz kərə yağı – otaq hərarətində yumuşaldılmış
2 stəkan şəkər tozu
2 yumurta – otaq hərarətində
425 g  ricotta pendiri və ya kəsmik
1 ədəd limonun suyu
1 ədəd limonun rəndələnmiş qabığı

1. Sobanı 190C-dək qızdırın.

2. Bir qabda unu, qabartma tozunu, duzu və hili qarışdırın.

3. İri bir qabda  kərə yağı və şəkər tozunu mikserlə ağaranadək, təxminən 3 dəqiqə ərzində çalın. Bir-bir yumurtaları əlavə edərək, çalmağa davam edin. Ricotta pendiri və ya kəsmiyi, limon suyunu və limon qabığını əlavə edib, mikserlə qarışanadək çalın. Unlu qarışığı bu qaba əlavə edib, bütün ərzaqlar qarışanadək bir az çalın.  Alınan kütlə “palcıq” kimi olacaq. Aşağıdakı şəkildə gördüyünüz kimi.

4.      2 ədəd soba listinin dibinə kalka kağızı sərin. Xəmirdən hər dəfə 2 xörək qaşığı qədər götürüb listə bir birindən 5 cm aralı  dairələr şəklində qoyun. Xəmiri yaymayın! Sadəcə olaraq hər qurabiyə üçün 2 qaşıq dolu xəmiri bir-birinin üstünə qoyun.

5. Qurabiyələri sobanın orta rəfində 15 dəqiqə ərzində, və yaxud kənarları bir az qızarana qədər bişirin. Hazır qurabiyələrin üstü ağ qalmalıdır. Listləri sobadan çıxardın. Qoyun qurabiyələr listdə 20 dəqiqə ərzində soyusun. Soyuduqdan sonra listdən çıxardıb, səthlərinə şəkır kirşanı (pudra) səpin.